Avropa

Çimərliklərdə tapılan ağ maddə nədir? - "Neste" MƏNBƏNİ TAPDI

31 Yanvar 2025 03:43

Finlandiyanın Hanko yarımadasının sahillərində tapılan ağ maddənin qranulları yük gəmisinin yuyucu sularından çıxmış ola bilər.

Publika.az xəbər verir ki, bu barədə Finlandiyanın "Neste" neft emalı şirkəti məlumat yayıb.

"Hanko sahillərində tapılan ağ qranulların "Neste" üçün yük daşıyan gəminin yuyulma suyundan əmələ gəldiyi ehtimal olunur", - şirkətin açıqlamasında deyilir.

Gəmidəki suyun tərkibində yemək yağı, heyvan yağı və bitki yağları olub. Gəmi heyəti, "Neste"yə bildirib ki, yuyucu suyun limanın tullantı su sisteminə axıdılmasına dair göstərişlər almayıb.

Şirkət hadisəyə görə məsuliyyəti öz üzərinə götürüb və mümkün zərəri kompensasiya edəcəyini bildirib.

Yanvarın 28-də Finlandiya mətbuatı bir neçə çimərlikdə doluya bənzəyən naməlum ağ maddənin tapıldığını bildirib . Təcili xidmətlər bunun insanlar üçün zərərsiz, lakin heyvanlar üçün təhlükəli olan təbii yağların qarışığı olduğunu müəyyən edib.

Hüseyn İbadlı