Müxalif sağçı partiyadan BÖYÜK SIÇRAYIŞ - Merts yeni anti-rekord qırdı

Almaniyada keçirilmiş son sosioloji sorğuya əsasən, Almaniya Federativ Respublikasının kansleri Merts əhali arasında dəstək səviyyəsinə görə yeni anti-rekord müəyyən edib.

Publika.az xəbər verir ki, respondentlərin cəmi 26 faizi hökumət başçısının fəaliyyətindən razı qaldığını bildirib, 62 faizi isə onun işini mənfi qiymətləndirib.

Eyni zamanda, vətəndaşların 63 faizi ümumilikdə hökumətin fəaliyyətindən narazıdır. Nazirlər kabinetini isə yalnız 23 faiz respondent dəstəkləyir. Bu, hazırkı hakimiyyətin işə başladığı vaxtdan bəri ən aşağı dəstək göstəricisidir.

INSA şirkətinin sorğusu göstərir ki, müxalif sağçı partiya olan “Almaniya üçün Alternativ” ilk dəfə reytinqlərdə birinci yerə yüksəlib — 26 faiz səs toplayaraq. Mertsin partiyası Xristian Demokrat/Xristian Sosial İttifaqı (CDU/CSU) isə 25 faizlə ikinci yerdədir. Sosial-demokratlar 15 faiz, “Yaşıllar” və “Solçular” isə hər biri 11 faiz səs toplayıb.

Hazırkı hakim koalisiya — CDU/CSU və SPD birlikdə yalnız 40 faiz səs toplayaraq parlamentdə çoxluq formalaşdıra bilməzdi. Bunun əksinə olaraq, “Almaniya üçün Alternativ” və CDU/CSU birlikdə 51 faiz səs toplayaraq hökumət qurmaq imkanına sahib olardı. Bu halda müxalifət partiyası baş tərəfdaş rolunu oynayardı.

Hüseyn İbadlı