Zelenskinin Avropa liderləri ilə məxfi söhbəti sızdırıldı: Trampla ehtiyatlı ol

Bəzi Avropa liderləri Vladimir Zelenskiyə ABŞ prezidenti Donald Trampla görüşündən əvvəl ehtiyatlı olmağı və "çox uzağa getməməyi" tövsiyə ediblər.

Publika.az xəbər verir ki, bu barədə “Spiegel” məlumat yayıb.

Nəşr bildirib ki, Zelenskinin şənbə günü ABŞ-a səfəri ərəfəsində Avropa liderləri ilə baş tutan videokonfransının ingilis dilindəki transkriptini əldə edib.

Nəşrin məlumatına görə, telekonfrans təşkil edən Almaniya kansleri Fridrix Merts Zelenskinin ərazi məsələləri, təhlükəsizlik zəmanətləri və yenidənqurma məsələləri ilə bağlı ABŞ ilə razılığa gəlməyin yollarını tapmasının vacib olduğunu bildirib. Merts Ukrayna prezidentindən "həddindən artıq uzağa getməməyi" və eyni zamanda "ehtiyatlı" olmağı xahiş edib.

Almaniya hökumətinin sözçüsü nəşrin şərh tələbinə cavab olaraq federal hökumətin məxfi danışıqların təfərrüatları ilə bağlı şərh vermədiyini bildirib. Zəngin digər iştirakçısı telekonfransın məzmununun dəqiq əks olunduğunu təsdiqləsə də, söhbət məxfi olduğundan konkret sitatları təsdiqləməkdən imtina edib.

Transkriptə görə, Fransa prezidenti Emmanuel Makron avropalıları təhlükəsizlik zəmanətləri üzərində işi sürətləndirməyə və iştiraklarını mümkün qədər tez yekunlaşdırmağa çağırıb.

NATO-nun baş katibi Mark Rutte də oxşar bir fikri ifadə edib: “Aavropalılar prosesi dayandırmış kimi görünməməlidirlər”. Bununla belə, bir neçə hökumət başçısı təhlükəsizlik zəmanətləri və ya hətta qoşunların yerləşdirilməsi üçün parlament baxışının zəruri olduğunu qeyd edib.

Şənbə günü keçirilən telekonfrans zamanı Danimarka, İsveç və Norveçin baş nazirləri Zelenskidən Trampla görüşündən sonra mümkün təhlükəsizlik zəmanətləri ilə bağlı Amerika vədləri barədə mümkün qədər çox məlumat verməsini istəyiblər.

Bunun "kağız üzərində" görülməli olduğu ifadəsi dəfələrlə səsləndirilib, Ukrayna prezidentinin təhlükəsizlik zəmanətlərinə dair qəti öhdəliklər götürmədən ərazi məsələləri ilə bağlı rəsmi güzəştlərə getməməsi tövsiyəsi də edilib.

Merts, həmçinin sülh müqaviləsinin bir hissəsi olmağa hazır olduqlarını, lakin imzalamadan əvvəl onun məzmununu bilməli olduqlarını vurğulayıb.

Transkriptə görə, bir neçə dövlət və hökumət başçısı Zelenskiyə Trampdan sülh planının hazırkı versiyası ilə bağlı Rusiyanın mövqeyini soruşmağı məsləhət görüb.

Bu 20 bənd, Rusiyanın güclü təsiri altında olan və yeni danışıqlar üçün başlanğıc nöqtəsi olan 28 bəndlik sənəddən əhəmiyyətli dərəcədə fərqlənir.

Tural