Fransa hökuməti yeni dəyişiklik astanasında - Makron təqdimat gözləyir

Fransa Baş Naziri Sebastyan Lekornu ölkənin büdcəsi təsdiqləndikdən sonra hökumətdə yenidən təşkilatlanma aparmağı planlaşdırır.

Publika.az xəbər verir ki, bu barədə "Tribune Dimanche" qəzeti məlumat yayıb.

“Baş nazir, büdcə məsələsi uğurla həll olunarsa, hökumətdə dəyişiklikləri Respublika Prezidentinə təqdim etməyi düşünür”, - qəzet yazıb.

Məlumata görə, Fransa büdcəsi fevralın ortalarına qədər yekun təsdiqini alacaq.

Bundan əvvəl, fransız deputatlar gün ərzində ikinci dəfə Baş nazir Lekornunun hökumətinə etimadsızlıq səsverməsini rədd ediblər. Bu, hökuməti istefaya göndərmək üçün artıq altıncı cəhd idi.

Xatırladaq ki, 11 oktyabr tarixində Prezident Emmanuel Makron Lekornunu bir neçə gün əvvəl istefa verdikdən sonra yenidən Baş nazir vəzifəsinə təyin edib. Lekornu isə açıqlayıb ki, bu təyinatı “borc hissi ilə” qəbul edir və siyasi böhranı aradan qaldırmaq niyyətindədir. O, əvvəlki təyinatdan bir ay sonra, 6 oktyabrda partiya daxili mübahisələr səbəbilə vəzifəsini tərk etmişdi.

Hüseyn İbadlı