Dəb

Dəb ilahələrinin qara lent dəbi – FOTOLAR

12 Fevral 2016 16:15

“Xalta” adı ilə tanınan qara lent şəklində boyunbağıların bu il dəbdə olacağını xəbər vermişdik. Qara lentlər dəb ilahələrinin də qəlbinə yol tapıb.

Xalta boyunbağılar bütün paltarlarla harmoniya təşkil etsə də, çiyni açıq, “V” yaxalıqlı geyimlərlə daha çox yaraşır. Yaxası dərin “V” dekolteli köynəklər həm silueti, həm də boynu da bir neçə santimetr uzun göstərir.

Qara lentlər qalınlığına görə fərqlidir. Yadda saxlayın ki, onları ancaq Odri Hepbern kimi uzun boynu olan xanımlar özünə rəva görə bilər. Lakin bu, o demək deyil ki, boynu uzun olmayan xanımlar xalta boyunbağılardan imtina etməlidir. Sadəcə, lentlərin daha nazik və zərif versiyalarını seçə bilərlər. Bəzəksiz adi qara lentlər gündəlik, üstü qızılı, gümüşü, ya da daşlarla bəzədilmiş qara boyunbağılar isə gecə ziyafətləri üçün nəzərdə tutulub. Yeri gəlmişkən qeyd edək ki, dizaynerlər xalta həvəskarları üçün lentlərin mavi və qırmızı kimi müxtəlif rənglərini də təklif ediblər.

Dünyanın bir çox məşhur ulduz modapərəstləri bu aksessuarı böyük məmnuniyyətlə taxır. Cici Hadid, Rihanna, Kendal Cenner, Miranda Kerr, Kristina və digər məşhurlar 90-cı illərin əsas trendi olan xalta boyunbağıları artıq çoxdan qiymətləndirib. Gəlin, onların xalta boyunbağı dəbini nəzərdən keçirək.

Aytən