Koronavirusun fakturası o ölkələrə kəsildi: BMT ödəniş tələb edir

“Karbon emissiyası yayan sənayelərə pul ödətməyin zamanı gəlib”.

Publika.az xəbər verir ki, bunu Birləşmiş Millətlər Təşkilatının Baş katibi Antonio Quterreş deyib.

Videokonfrans yoluyla danışan baş katib qeyd edib ki, postpandemiya zamanı itkiləri aradan qaldırmaqla iqlim dəyişikliyi ilə mübarizə tədbirləri paralel aparılmalıdır.

O, pandemiyanın ziyan vurduğu iqtisadiyyatlar canlandırılarkən hökumətlərin xərclərini karbon emissiyasını sıfıra endirməyə və yaşıl məşğulluq yaratmağa ayırmasının vacibliyini vurğulayıb: “Vergi mükəlləflərinin pulu təbii yanacaqları maliyyələşdirmək və kəskin karbon emissiyası yayan sənayeləri xilas etmək üçün istifadə olunmamalıdır”.

Quterreş başda atmosferə ən çox tullantı qaz atan ölkələr olmaqla, bütün dövlətləri 2050-ci ilə qədər sıfır karbon hədəfinə çatmaq üçün strategiyalar müəyyən etməyə çağırıb.

Jurnalistin “pandemiya ilə mübarizə mövzusunda həmrəy olub hələ ki, bir qərar qəbul edə bilməyən BMT Təhlükəsizlik Şurası sizdə məyusluq yaratdımı” sualına baş katib belə cavab verib: “Bu gün dünyada böyük güclər arasındakı münasibətlər funksiyasızdır. Bu da Təhlükəsizlik Şurasının beynəlxalq əməkdaşlıq məsələsində qərar verməsini çətinləşdirir. Xüsusilə güclü ölkələrin pandemiya və digər təhlükəsizlik məsələləri ilə mübarizə üçün toplaşıb uzlaşmasına ehtiyacımız var”.

Zümrüd