Saakaşvili ölüm ayağında: Vəziyyəti o qədər ağırdır ki...

“Gürcüstanın həbsdə olan keçmiş prezidenti Mixeil Saakaşvilinin nevroloji və fiziki vəziyyəti o qədər ağırdır ki, əlilliyə və ya ölümə yaxındır. Onun xaricdə müalicəyə ehtiyacı var”.

Publika.az xəbər verir ki, bu barədə Gürcüstan Ombudsmanı yanında yaradılmış şuranın üzvü Otar Toidze məlumat yayıb.

“Vaxt azdır, vəziyyəti o qədər ağırdır ki, onun təcili hansısa xarici klinikada müalicəyə ehtiyacı var... Dedik ki, proses getdikcə xəstəni hələlik əlilliyə, daha sonra ola bilsin ki, ölümə aparacaq. İndi biz o nöqtədəyik. Hazırda yaşadığı nevroloji proseslərə əsasən onun vəziyyətini geri qaytarmağın mümkün olub-olmadığını bilmirəm... Doğrudanmı ölən prezidenti göstərməliyik ki, əhali onun vəziyyətinə inansın?” - deyə Otar Toidze jurnalistlərə bildirib.

Bundan əvvəl Gürcüstan Ədliyyə Nazirliyinin Penitensiar Xidməti müxalifətin Saakaşvilinin səhhətinin kəskin şəkildə pisləşməsi ilə bağlı yaydığı məlumatı təkzib etmişdi. Xidmətin məlumatına görə, “siyasətçi gecə-gündüz intensiv həkim nəzarətindədir və bütün tibbi xidmətlərlə təmin edilir”.

Ötən həftə Saakaşvili onun işi üzrə məhkəmə iclasında özünü zəif hiss etdiyini, yemək yeyə bilmədiyini və son bir neçə gündə 12 kiloqram arıqladığını bildirib. Məhkəmə iclasının başlamasından 5 dəqiqə sonra Saakaşvili çıxışını yarımçıq kəsərək həkimdən kömək istəyib.