ABŞ-dan "Taliban" üzvlərinə qarşı məhdudiyyət - Qadınlara görə

ABŞ dövlət katibi Entoni Blinken Əfqanıstanda qadınlara qarşı ayrı-seçkilik siyasəti yürüdən "Taliban" üzvlərinə qarşı viza məhdudiyyətləri tətbiq edib.

Publika.az xəbər verir ki, Blinkenin bəyanatını Dövlət Departamentinin mətbuat xidməti yayıb.

“Bu gün mən Əfqanıstanda qadın və qızlara qarşı repressiyaya görə məsuliyyət daşıyan və ya iştirak edən "Taliban"ın bəzi hazırkı və ya keçmiş üzvlərinə, qeyri-dövlət təhlükəsizlik qruplarının üzvlərinə və digərlərinə əlavə viza məhdudiyyətləri tətbiq etmək üçün tədbirlər görürəm”, - bəyanatda deyilir.

Sənəddə vurğulanır ki, Amerika hökuməti "Taliban"ın hərəkətlərini kəskin şəkildə pisləyir: "Birləşmiş Ştatlar əfqan xalqının yanındadır və bütün əfqanların, o cümlədən qadınların və qızların insan hüquqları və əsas azadlıqlarına hörmətin təşviqi və dərinləşdirilməsi üçün mümkün olan hər şeyi etməyə sadiqdir”.

2021-ci ildə hakimiyyətə gəldikdən sonra "Taliban", onların fikrincə, İslam dəyərlərinə uyğun gələn bəzi məhdudiyyətlər tətbiq edib. Xüsusən də radikallar qadın teleaparıcıları hicab taxmağa məcbur edib, dramatik filmlərin və qadın aktrisaların iştirakı ilə verilişlərin nümayişinə qadağa qoyub.

Ayşən