Zelenski əmindir: "Onu yavaş-yavaş öldürürlər"

Ukrayna prezidenti Vladimir Zelenski Gürcüstan hakimiyyətini ölkənin eks-prezidenti Mixail Saakaşvilini azad etməyə və “onun edamının qarşısını almağa” çağırıb. O əmindir ki, Saakaşvili “yavaş-yavaş öldürülür”.

Publika.az xəbər verir ki, bu barədə Zelenski "Twitter"də yazıb.

“Sadəcə, indi Ukrayna vətəndaşı, Gürcüstanın keçmiş prezidenti Mixail Saakaşvili yavaş-yavaş öldürülür. Hətta 21-ci əsrdə Avropada bir insanın de-fakto açıq şəkildə edam edilməsi cəhdinə qarşı hələ də mübarizə aparmağın özü də biabırçılıqdır!” – Ukrayna lideri yazıb.

Zelenski Gürcüstan hakimiyyətini “Avropa insan haqları standartları üzrə öhdəliklərini yadda saxlamağa və zorakılığa son qoymağa” çağırıb.

“Ukrayna həll yollarını təklif etdi. Mən bütün dünyanı Mixailin həyatını xilas etməyə və onun edamının qarşısını almağa kömək etməyə çağırıram”, - o əlavə edib.

Dekabrın 20-də Zelenski Gürcüstanı Saakaşvilini müalicə üçün Ukraynaya və ya başqa ölkəyə göndərməyə çağırırdı. Ukrayna liderinin sözlərinə görə, Saakaşvilinin vəziyyəti hazırda ağırdır və onun başına gələnləri istehza adlandırıb.

Ayşən