Türkiyə Maskın təklifini rədd etdi

Türkiyə hökuməti amerikalı sahibkar İlon Maskın zəlzələdən sonra yardım üçün Starlink peyk rabitə sistemlərini ölkəyə göndərmək təklifini qəbul etməyib.

Publika.az xəbər verir ki, bu barədə “Bloomberg” məlumat yayıb.

Agentliyin məlumatına görə, türk rəsmisi adının açıqlanmaması şərti ilə Maska təşəkkür edib, respublikanın kifayət qədər peyk tutumuna malik olduğunu bildirib. O əlavə edib ki, ölkədə akkumulyatorla işləyən baza stansiyaları var, lakin bəzi ərazilər elektrik enerjisi ala bilmir.

Mask daha əvvəl "Tvitter" hesabında yazmışdı ki, onun SpaceX şirkəti rəsmi Ankaradan icazə alan kimi Starlink peyk rabitə sistemlərini Türkiyəyə göndərməyə hazırdır.

Xatırladaq ki, fevralın 6-da yerli vaxtla saat 04:17-də Türkiyənin Kahramanmaraş vilayətində 7,7 bal gücündə zəlzələ baş verib və bir sıra şəhərlərdə dağıntılara səbəb olub. Fevralın 6-da günorta saatlarında daha iki güclü afterşok qeydə alınıb. Suriyanın bir sıra bölgələrində də ciddi dağıntılar qeydə alınıb.

Ayşən