23 nəfər itkin düşüb - "Qabriel"ə görə

Yeni Zelandiya polisi "Qabriel" tropik siklonunun yaratdığı tufan və daşqınlar zamanı itkin düşən 23 nəfəri tapa bilməyib.

Publika.az xəbər verir ki, bu barədə cümə günü polis məlumat yayıb.

“İtkin düşmüş 23 nəfərlə əlaqə saxlamaq polis üçün prioritet olaraq qalır və biz bir sıra müxtəlif üsullardan istifadə etməklə mümkün qədər tez işləyirik”, - deyə məlumatda bildirilir.

“Son gün ərzində polis tərəfindən 443 qabaqlayıcı tədbir həyata keçirilib. Bu müddət ərzində bizə 526 zəng daxil olub, o cümlədən 15 oğurluq, 2 avtomobil oğurluğu faktı. Müxtəlif hüquqpozmalara görə 13 nəfər həbs edilib”, - deyə hüquq-mühafizə orqanlarından bildirilib.

Qeyd edək ki, Yeni Zelandiyanın Şimal adasını vuran “Qabriel” onun mərkəzi və cənub-şərq bölgələrində genişmiqyaslı daşqın və sürüşmələrə səbəb olub. 11 nəfər həlak olub, daha 23 nəfər itkin düşüb. Su basmış yaşayış məntəqələrindən 10 mindən çox insan təxliyə edilib, bəzi yaşayış məntəqələrində su təchizatı kəsilib, adanın 250 minə yaxın sakini bir neçə gün ərzində işıqsız və rabitəsiz qalıb.

Ayşən