Avropa Şurasından Gürcüstana çağırış: Bu qanun layihəsi prinsiplərə ziddir

Avropa Şurası Gürcüstana xəbərdarlıq edib ki, “Xarici təsirin şəffaflığı haqqında” qanun layihəsinin qəbulu ölkədə vətəndaş cəmiyyəti təşkilatlarının işinə ciddi mənfi təsir göstərə bilər.

Publika.az xəbər verir ki, bu barədə Avropa Şurasının insan hüquqları üzrə komissarı Dunya Miyatoviçin Gürcüstan parlamentinin sədrinə ünvanladığı məktubda deyilir.

“Belə bir qanunvericilik təşəbbüsü, birləşmək və ifadə azadlığına dair Avropa Şurasının standartları fonunda bir sıra insan hüquqları ilə bağlı narahatlıq doğurur”, - o bildirib.

Miyatoviç Gürcüstan parlamentini bu və ya digər oxşar qanun layihəsini rədd etməyə və vətəndaşların ictimai işlərdə fəal iştirakını qeyd-şərtsiz təşviq etməyə, habelə vətəndaş cəmiyyəti təşkilatlarının və insan hüquqlarının fəaliyyəti üçün əlverişli mühit yaratmağa çağırıb.

Aİ-nin Gürcüstandakı səfiri xəbərdarlıq edib ki, “Xarici təsirin şəffaflığı haqqında” layihə Aİ-nin prinsiplərinə ziddir.

ABŞ Dövlət Departamenti də "xarici agentlər" haqqında təklif olunan qanunun təsdiqlənəcəyi təqdirdə, Gürcüstanda ifadə azadlığına təsir göstərəcəyindən narahatlığını bildirib.

Ayşən