Şok gəlişmə: BƏƏ prezidenti Əsədi Dubaya dəvət etdi

Birləşmiş Ərəb Əmirliklərinin (BƏƏ) prezidenti Məhəmməd bin Zeid Əl Nəhyan Suriya prezidenti Bəşər Əsədi noyabrın 30-dan dekabrın 12-dək Dubayda keçiriləcək BMT-nin COP28 iqlim konfransında iştirak etməyə dəvət edib.

Publika.az xəbər verir ki, bu barədə Birləşmiş Ərəb Əmirliklərinin Dəməşqdəki diplomatik nümayəndəliyi məlumat yayıb.

“Suriya Ərəb Respublikasının Prezidenti Bəşər Əsəd BƏƏ-nin Suriyadakı səfiri vəzifəsini icra edən Abdel Hakim əl-Naimi qəbul edib və o, BƏƏ prezidenti Məhəmməd bin Zeid Əl Nəhyanın tədbirdə iştirak etmək üçün dəvətini ona təqdim edib”, - mesajda deyilir.

Qeyd edək ki, may ayında Səudiyyə Ərəbistanı başda olmaqla ərəb ölkələri Suriyanın 2011-ci ildə bu ölkədə silahlı qarşıdurmaların başlamasından sonra dondurulmuş Ərəb Liqasına (LAS) üzvlüyünü bərpa etmək qərarına gəlib. Bu, Suriya prezidenti Bəşər Əsədin regional təşkilatın işində iştirakını mümkün edib, xüsusən o, mayın 19-da Ər-Riyadda keçiriləcək Ərəb Liqasının sammitinə dəvət alıb.

Ayşən