Hindistan tələb etdi: Bu ölkədən Çinə qadağa gəldi

Cənubi Asiya ölkəsi Şri-Lanka Hindistanın təhlükəsizlik narahatlıqlarına cavab vermək üçün Çin tədqiqat gəmilərinin öz limanlarında lövbər salmasını və eksklüziv iqtisadi zonada fəaliyyətini müvəqqəti dayandıracaq.

Publika.az xəbər verir ki, “Hindustan Times” qəzetinin diplomatik mənbələrə əsaslanaraq verdiyi xəbərə görə, Şri-Lanka hökuməti Çinin tədqiqat gəmilərinə 1 illik moratorium qoyacağını Hindistan rəsmilərinə çatdırıb.

Kolombo administrasiyası Çinin tədqiqat və kəşfiyyat gəmilərinin Hind okeanındakı fəaliyyətinə görə bir müddətdir ki, ABŞ və onun sahil qonşusu Hindistanın xəbərdarlıqları ilə üzləşib. Qadağa ilə bağlı Şri-Lanka və Çindən hələlik heç bir açıqlama verilməsə də, moratoriumun Çinin “Xiang Yang Hon 3” okean tədqiqat gəmisinin 2019-cu ildən həyata keçirməsi planlaşdırılan tədqiqat ekspedisiyasının ləğvinə səbəb ola biləcəyi proqnozlaşdırılır.

Hindistan administrasiyası əvvəllər Çinin Hind okeanında okean araşdırması, skan, xəritəçəkmə və radar avadanlıqları ilə təchiz edilmiş gəmilərlə fəaliyyət göstərməsi ilə bağlı təhlükəsizlik narahatlığını ifadə edib.

Hindistanın baş naziri Narendra Modi iyulun 21-də Şri-Lanka prezidenti Ranil Vikremesinqhe ilə görüşündə ölkəsinin “strateji və təhlükəsizlik narahatlıqlarına hörmət edilməsini” tələb edib. Yeni Dehli administrasiyası ötən ilin oktyabr və noyabr aylarında Çinin "Şi Yan 6" tədqiqat gəmisinin Şri-Lanka ilə birgə dəniz tədqiqatı ekspedisiyası keçirməsinə etiraz edib.

Aysel Şahmar