BBC-nin redaktoru Colanidən soruşdu: Əfqanıstan kimi olacaqsınız?

Suriyanın faktiki lideri Əbu Məhəmməd Əl Colani BBC-nin Yaxın Şərqdəki redaktoru Ceremi Bovenin suallarını cavablandırıb.

Publika.az xəbər verir ki, müsahibə üçün Əsəd ailəsinin Dəməşqdə tikdirdiyi prezident sarayını seçən Colani Suriyanın müharibədən yorulduğunu, ölkənin qonşuları və ya Qərb üçün təhlükə olmadığını bildirib.

“Heyət Təhrir əş-Şam" (HTŞ) lideri Suriyaya qarşı sanksiyaların ləğvinə çağırış edib:

“Bütün baş verənlərdən sonra əvvəlki sanksiyalar ləğv edilməlidir. Məzlum və zalımla eyni rəftar edilməməlidir. Suriya və Əfqanıstan çox fərqlidir. Suriyada qurulacaq hökumət və idarəçilik üslubu ölkənin tarixi və mədəniyyətinə uyğun formalaşacaq. Səkkiz ildən artıqdır ki, İdlibdə universitetlərimiz var. Universitetlərdə tələbə qızların sayı 60 faizdən çoxdur.

Ölkədə spirtli içkilərin istehlakı hüquqi məsələlər olduğu üçün danışmağa icazəm olmayan çox şey var. Konstitusiyanı hüquqşünaslardan ibarət komissiya hazırlayacaq. Onlar qərar verəcəklər. Hər bir dövlət başçısı bu qanunlara əməl etməli olacaq”.

Aysel Şahmar