Şimali Koreyadan ABŞ-a xəbərdarlıq: Bundan istifadə edəcəyik

ABŞ-ın yeni seçilmiş prezidenti Donald Tramp yanvarın 20-də administrasiyanı təhvil almağa hazırlaşarkən Şimali Koreya ABŞ-ı hədələyib.

Publika.az xəbər verir ki, Şimali Koreya Xarici İşlər Nazirliyi bəyanat yayıb.

Bəyanatda ABŞ və müttəfiqlərinin ilin əvvəlindən Şimali Koreyanın təhlükəsizliyinə ciddi təhdidlər törətdiyi iddia edilib. Yaponiya və Cənubi Koreyanın iştirakı ilə Koreya yarımadası və onun ətraf ərazilərində birgə təlimlərin keçirildiyi xatırladılıb:

“ABŞ-ın siyasi və hərbi təxribatları silahlı münaqişə təhlükəsini artıran və regional sabitliyi pozan əsas səbəblərdir. Bu, Koreya yarımadasındakı hərbi-siyasi vəziyyətin yeni ildə təhlükəli inkişafa gedəcəyinə işarədir”.

Şimali Koreyanın ABŞ-ın təxribatlarından ciddi şəkildə narahat olduğu qeyd edilib: “Şimali Koreya istənilən hərbi təxribatın qarşısını alacaq və özünümüdafiə hüququndan daha dolğun şəkildə istifadə etməklə öz maraqlarını, regional sülh və sabitliyi qoruyacaq”.

Qeyd edək ki, Şimali Koreya yanvarın 6-da ortamənzilli hipersəs ballistik raketini, yanvarın 14-də isə bir neçə qısamənzilli ballistik raketi sınaqdan keçirib. Co Bayden dövründə Vaşinqtonla gərgin məcrada olan Pxenyanın son addımları Donald Tramp hökumətinə qarşı hədə-qorxu kimi şərh edilib.

Roza