Türkiyə-Azərbaycan münasibətlərində pərdəarxası oyun: Tofiq Zülfüqarov açıqladı

Azərbaycanın keçmiş xarici işlər naziri Tofiq Zülfüqarov Türkiyə-Azərbaycan münasibətlərindəki mövcud soyumanın səbəbləri ilə bağlı fikirlərini bölüşüb.

Publika.az xəbər verir ki, Tofiq Zülfüqarov bu barədə “Facebook” hesabında yazıb.

O bildirib ki, Türkiyə-Azərbaycan münasibətlərinin hazırkı soyumasının əsas səbəbinin mediada yer alması açıq şəkildə göstərir ki, bu, "cherchell femme"nin ənənəvi fransız səbəbi deyil, bütün dövrlərin və bütün xalqların ənənəvi "zəifliyi" - pul sevgisidir...

“Türkiyənin müasir tarixində ən uğurlu liderin hakimiyyəti dövrünün başa çatmağa yaxınlaşdığını yaxından, bəlkə də çox yaxından müşahidə edən kimsə - kim olduğunu dəqiq bilirik - siyasi karyerasının uğurlarını Azərbaycanla müttəfiqlik hesabına pula çevirmək qərarına gəlib. Hər şey olduqca sadədir. Bu, açıq-aşkar görünür”, - deyə o qeyd edib.

Keçmiş nazirin sözlərinə görə, bu cəhdin müəllifləri gözlədikləri dividentləri əldə edə bilməyəcəklər. Eyni zamanda, Azərbaycanın prinsipial mövqeyi gələcək üçün yaxşı dərs olacaq.

Tofiq Zülfüqarov vurğulayıb ki, Azərbaycan və Türkiyə arasında müttəfiqlik davam edəcək və daha da möhkəmlənəcək.

“Qardaş xalqların iradəsini həyata keçirərək bu müttəfiqliyin əsasını qoyan iki lider - İlham Əliyev və Rəcəb Tayyib Ərdoğan olub. Müttəfiqliyimiz təkcə sağlam siyasi elitalarımızın və xalqlarımızın buna can atdığı üçün deyil, həm də geosiyasi vəziyyətə, hətta coğrafi reallıqlara görə davam edəcək. Ən əsası isə əsrin sivilizasiya layihəsi olan türk dövlətlərinin birliyi müttəfiqliyimiz möhkəmləndirilmədən mümkün deyil”, - deyə o bildirib.

Müəllif: Adəm Abbaslı