Putinin səfəri öncəsi Hindistan və Rusiya bu müqaviləni imzaladı

Hindistan və Rusiya, Vladimir Putinin gözlənilən Hindistan səfərindən bir neçə həftə əvvəl sərnişin təyyarələrinin birgə istehsalı haqqında saziş imzalayıblar.

Publika.az xəbər verir ki, bu barədə “Bloomberg” məlumat yayıb.

Hindistanın dövlət şirkəti Hindustan Aeronautics Ltd. (HAL) çərşənbə axşamı Rusiyanın Birləşmiş Təyyarə Korporasiyası (UAC) ilə SJ-100 tipli mülki sərnişin təyyarələrinin istehsalına dair müqavilə imzalandığını açıqlayıb.

Bəyanatda texnologiyanın Hindistana transferi və ya sərmayə qoyuluşu ilə bağlı məlumat verilməyib. Məlumata görə, razılaşma çərçivəsində HAL Hindistan bazarı üçün ikimühərrikli dar gövdəli SJ-100 təyyarələrinin istehsal hüququna malik olacaq.

“Bu, Hindistanda tam hüquqlu sərnişin təyyarəsinin ilk dəfə istehsal ediləcəyi layihədir. HAL və UAC arasındakı bu əməkdaşlıq qarşılıqlı etimadın nəticəsidir”, - bəyanatda qeyd olunub.

Bildirilir ki, saziş Hindistanın baş naziri Narendra Modinin “Made in India” təşəbbüsünü dəstəkləyir. Hindistan 2047-ci ilə qədər hava limanlarının sayını 350-yə çatdırmağı planlaşdırdığı üçün bu addım ölkənin daxili aviasiya tələbatını qarşılamağa kömək edəcək.