İsraildən etiraf: Türkiyəyə qarşı diplomatik ittifaq çağırışı və F-35 təzyiqi

İsrail rəsmiləri Türkiyənin Şərqi Aralıq dənizində və Suriyada güclənən mövqeyindən narahat olduqlarını açıq şəkildə etiraf ediblər.

Publika.az xəbər verir ki, İsrailin siaspora işləri və antisemitizmlə mübarizə naziri Amixay Çikli Türkiyəni “İsrail üçün ən ciddi təhdid” adlandırıb.

KAN televiziyasına danışan Çikli, Ankaranın Suriyadakı hərbi mövcudluğunun və Dəməşqə göstərdiyi dəstəyin İsrail üçün təhlükə yaratdığını bildirib. O, Suriya rəhbərliyinə bağlı yeni hərbi strukturun İsrail əleyhinə olduğunu və bundan ciddi narahatlıq duyduqlarını vurğulayıb.

Çikli bölgədə diplomatik cəbhənin genişləndirilməsinin vacib olduğunu qeyd edərək, Yunanıstan və Cənubi Kipr Rum Administrasiyası ilə ittifaq qurulmasını vurğulayıb.

“Türkiyəni diplomatik olaraq tənha qoymaq üçün hər şeyi etməliyik”, - deyə o qeyd edib.

İsrailin ABŞ-dakı səfiri Yahiel Leiter isə “Jerusalem Post”a açıqlamasında Təl-Əvivin Türkiyəyə F-35 satılmasının qarşısını almaq üçün Vaşinqtonda fəal şəkildə çalışdığını etiraf edib.

Səfir Türkiyənin strateji əhəmiyyətini qəbul etsə də, Ankara ilə münasibətlərdə gərginlik olduğunu bildirib. Leiter Səudiyyə Ərəbistanına F-35 satışına eyni reaksiya göstərmədiklərini vurğulayaraq bunun İsrailin regional üstünlüyünə təsir etməyəcəyini deyib.

“Türkiyənin ABŞ-dan F-35 almamasını üstün tutarıq”, - o əlavə edib.

Leiter deyib ki, İsrailin əsas məqsədi Türkiyənin Suriya və Qəzzada hərbi mövcudluğunu önləməkdir.

Roza