Yeni NATO yaradılır, hədəf isə yalnız Təl-Əviv deyil

İsrailin "i24NEWS" kanalında çıxış edən Türkiyə üzrə ekspert Hay Eytan Koen Yanarocak Türkiyənin Yaxın Şərqdə oyun qaydalarını yenidən yazmaq üçün strateji addım atdığını bildirib.

Publika.az xəbər verir ki, Yanarocak Ankaranın Yaxın Şərqdə İsrailə qarşı güc balansını dəyişdirəcək yeni ittifaqın astanasında olduğunu irəli sürüb.

Onun sözlərinə görə, Ankaranın İsrail, Yunanıstan və Kipr Rum Administrasiyasına qarşı regional güc balansında dominantlığını artırmaq bu məqsədinin sübutudur: "Türkiyə bu üç ölkə arasında inkişaf edən strateji yaxınlaşmanı özünə qarşı regional təhlükə kimi qəbul edib. Buna görə də Ankara İsraili də əhatə edən bu əməkdaşlığa qarşı balanslaşdırılmış hərbi struktur yaratmaq istəyir".

Yanarocak bildirib ki, Türkiyənin hədəflədiyi struktur adi bir əməkdaşlıq yox, bir növ "İslam NATO"su deməkdir:

"Türkiyə illərdir, xüsusən də Suriya arenasında təhlükəsiz əməkdaşlıq modelləri inkişaf etdirməyə çalışır. Gələcəkdə bu quruluşa Suriya, Livan, İordaniya və hətta Misir daxil edilə bilər. Lakin İsrail bu planlaşdırılan ittifaqın mərkəzində olmasına baxmayaraq, Təl-Əviv yeganə hədəf deyil. Birləşmiş Ərəb Əmirlikləri də bu potensial ittifaqdan ehtiyatlı olmalıdır. Ər-Riyad və Əbu-Dabi arasındakı son gərginlik bu mənzərəni gücləndirib".

Ekspert bu quruluşu “yarı-taktiki, yarı-strateji” adlandırıb. O qeyd edib ki, ittifaq beynəlxalq hüquqa əsasən legitim olacaq, ABŞ isə bunun qarşısını almaq üçün çox məhdud vasitələrə malikdir.

Roza