Makqreqorun qayıdışı fonunda həyəcan təbili çaldılar: Bu video onları niyə qorxudub?

UFC ulduzu Konor Makqreqor mümkün qayıdışı ilə yenidən diqqət mərkəzinə düşüb.

Publika.az xəbər verir ki, irlandiyalı döyüşçünün yeni məşq videosu azarkeşlər arasında birmənalı qarşılanmayıb.

37 yaşlı idmançı sosial şəbəkədə ağır kisə ilə işlədiyi, zərbə seriyaları və kombinasiyalar nümayiş etdirdiyi görüntülər paylaşıb. Videoya əlavə etdiyi qısa, lakin diqqətçəkən şərh belə olub: “Zəhmət olmasa, cənab”.

Bəzi azarkeşlər əfsanənin məşqlərə qayıtmasından ruhlansa da, digərləri onun fiziki vəziyyəti ilə bağlı narahatlıqlarını gizlətməyib. Şərhlərdə Makqreqorun formasına və uzun fasilədən sonra ciddi döyüşə hazır olub-olmamasına dair şübhələr səsləndirilib.

Xatırladaq ki, Makqreqor sonuncu dəfə 2021-ci ildə oktaqona çıxıb. O zaman Dastin Puaryeyə qarşı döyüşdə ağır zədə alaraq ayağını sındırmışdı. Həmin vaxtdan bəri onun qayıdışı dəfələrlə təxirə salınıb.

İrlandiyalının 2024-cü ildə Maykl Çendlerə qarşı döyüş keçirəcəyi gözlənilsə də, ayaq barmağındakı zədə səbəbindən bu plan baş tutmamışdı. Hazırda isə onun geri dönüşünün iyul ayında keçiriləcək UFC 329 turnirində reallaşacağı ehtimal olunur.