ABŞ bu ölkəni hədələdi: Onu baş nazir təyin etməyin, İranın adamıdır

Vaşinqton İraq hakimiyyətini Nuri əl-Malikinin baş nazir təyin olunacağı təqdirdə ölkənin neft ixracından əldə etdiyi gəlirlərin azalacağı ilə bağlı xəbərdarlıq edib.

Publika.az xəbər verir ki, bu barədə “Bloomberg” agentliyi bir neçə mənbəyə istinadən məlumat yayıb.

Mənbələrə görə, müvafiq siqnal ötən həftə Türkiyədə İraq Mərkəzi Bankının sədri Əli əl-Ələq ilə ABŞ-ın yüksək vəzifəli rəsmiləri arasında keçirilən görüşdə verilib. Agentliyin mənbələrinə görə, ABŞ əl-Malikini İrana çox yaxın hesab etdiyini açıq şəkildə bildirib.

Ağ Evin sözçüsü görüşü təsdiqləyib, lakin bunun adi texniki xarakter daşıdığını və əl-Malikinin namizədliyi ilə əlaqəli olmadığını bildirib. Əl-Ələqanın özü də “Bloomberg”ə verdiyi şərhdə hər hansı bir təhdidi rədd edərək, danışıqların yalnız texniki məsələlərə yönəldiyini və siyasi məsələlərə toxunmadığını qeyd edib.

Lakin Əl-Malikinin ətrafı onun mövqeyinin dəyişməz qaldığında israr edir. Onun sözçüsü Hişam əl-Rikabi Əl-Malikinin hələ də namizəd kimi nəzərdən keçirildiyini və heç bir dəyişiklik edilmədiyini bildirib.

İraqda parlament seçkiləri noyabr ayında keçirilib, lakin hakim koalisiyanın formalaşması hələ başa çatmayıb. Hazırkı hakimiyyət bölgüsü sisteminə əsasən, baş nazir şiə tərəfindən tutulur, digər əsas vəzifələr isə sünnilər və kürdlər arasında bölüşdürülür.

Tehranın mövqeyi ilə tanış mənbələrə görə, İran ona yaxın olan İraq siyasətçilərinə ABŞ təzyiqinə uymamağı tövsiyə edib. Bundan əvvəl İranın Ali Lideri Əli Xamenei İslam İnqilabı Keşikçiləri Korpusunun komandiri İsmayıl Qaanini əl-Malikinin namizədliyi münasibətilə İraq liderlərini təbrik edən məktubla Bağdada göndərib. “Bloomberg” mənbələrinə görə, bu addım Vaşinqtonda narazılığa səbəb olub.

Nuri əl-Maliki 2006-cı ildən 2014-cü ilə qədər İraq hökumətinə rəhbərlik edib. 2014-cü ilin avqust ayında o, vəzifəsindən uzaqlaşdırılıb və İŞİD yaraqlılarının irəliləməsi fonunda istefa verdiyini açıqlayıb.

Tural