Tramp Tehrana təslim oldu: İran, İraq və Vaşinqton küçələrində şənlik başladı

İran və İraqın onlarla şəhərində minlərlə insan bayraq və plakatlarla küçələrə axışıb. Sakinlər ABŞ ilə münaqişənin başa çatmasını və əldə olunan atəşkəsi böyük qələbə kimi qeyd edirlər.

Publika.az xəbər verir ki, ABŞ prezidenti Donald Trampın Tehranın təkliflərini demək olar ki, heç bir şərt qoymadan qəbul etdiyi bildirilir.

Bayram atmosferi təkcə Yaxın Şərqdə deyil, Vaşinqtonda da hiss olunur. Ağ Evin qarşısına toplaşan sülh tərəfdarları müharibə təhlükəsinin sovuşmasını və tarixi razılaşmanı sevinclə qarşılayıblar.

İran Təhlükəsizlik Şurası rəsmi olaraq bəyan edib ki, ölkə Vaşinqtonla dialoqda bütün hədəflərinə çatıb. Tehranın məlumatına görə, ABŞ İranın daxili işlərinə qarışmayacağına və uranın zənginləşdirilməsinə qoyulan məhdudiyyətlərdən imtina edəcəyinə zəmanət verib.

Donald Tramp isə öz növbəsində tərəflərin gərginliyə səbəb olan bütün mübahisəli məsələləri demək olar ki, həll etdiyini vurğulayıb.

İranın xarici işlər naziri Abbas Araqçı strateji əhəmiyyətli Hürmüz boğazı ilə bağlı mühüm detalı açıqlayıb. O bildirib ki, boğaz üzərində nəzarət tamamilə Tehranda qalacaq və iki həftə ərzində ərazidə hərəkət tam bərpa olunacaq.

Müəllif: Adəm