İranı dəhşətli aqibət gözləyir: “Şah damarı” kəsiləcək - ABŞ-ın qorxunc planı üzə çıxdı

İslamabadda keçirilən 21 saatlıq kritik sammit fikir ayrılığı ilə başa çatdı. ABŞ mediası Vaşinqtonun Tehranın tam blokadası planını açıqladı və İranın "şah damarı”nın hədəfə alına biləcəyini irəli sürdü.

Publika.az xəbər verir ki, “Just the News”un məlumatına görə İran ABŞ-ın təklif etdiyi yekun razılaşmanı qəbul etməsə, Tramp əvvəllər vəd etdiyi kimi, "Tehranı Daş dövrünə qayıdana qədər bombalamaq" variantına əl ata bilər.

Məqalədə deyilir ki, "Tramp Venesuelada tətbiq etdiyi blokada strategiyasını yenidən aktivləşdirməklə İran iqtisadiyyatını çökdürə, Çin və Hindistana diplomatik təzyiqi artırmaqla onları həyati əhəmiyyətli neft mənbəyindən məhrum edə bilər".

ABŞ mediası həmçinin qeyd edib ki, Venesuelanın blokadasına rəhbərlik edən nəhəng təyyarədaşıyan gəmi “USS Gerald Ford” qısa texniki xidmət və heyət istirahətindən sonra Fars körfəzinə köçürülüb.

Ekspertlər deyirlər ki, Trampın İranın Hörmüz boğazı üzərindəki nəzarətini alt-üst edəcək bir blokada tətbiq edə biləcəyi ehtimalı var.

Lexinqton İnstitutunun milli təhlükəsizlik üzrə eksperti Rebekka Qrant bununla bağlı açıqlamasında bildirib: "ABŞ Hərbi Dəniz Qüvvələrinin hazırda Boğazdan keçən hər şeyə tam nəzarət etməsi çox asan olardı. Son 24 saat ərzində təxminən 10 gəminin hərəkət etdiyini eşitmişəm. Onlardan biri Rusiya bayrağı altında üzən tanker idi. Yükün Çin və Hindistana getdiyini bilirik və həmçinin daxil olan trafiki də görürük”.

Qrant həmçinin bildirib ki, əgər İran güzəştə getməsə, ABŞ Hərbi Dəniz Qüvvələri geniş dəniz nəzarəti qura və boğaza daxil olan və çıxan hər şeyi izləyə bilər. Hörmüz boğazının dar keçidlərindən və ya Hark adasından keçmək istəyən hər kəs ABŞ Hərbi Dəniz Qüvvələrindən icazə almalı olacaq.

Hesabata görə, Tramp administrasiyası İranın təklifi rədd etməsi halında artıq bir neçə variant hazırlayıb və dəniz blokadası ideyası ilk dəfə ötən həftə ölkənin aparıcı hərbi strateqlərindən biri olan təqaüdçü general Cek Kin tərəfindən qaldırılıb.

Kin özünün "New York Post" qəzetindəki köşəsində bildirib ki, "Əgər müharibə yenidən başlasa və İranın qalan hərbi aktivlərini kifayət qədər zəiflətsək, ABŞ ordusu Hark adasını işğal etməyi və ya məhv etməyi seçə bilər".

Kin bildirib ki, alternativ olaraq, ABŞ Hərbi Dəniz Qüvvələri Tehranın ixrac xəttini kəsərək blokada tətbiq edə bilər.

“Əgər Harkın infrastrukturunu qoruyub saxlasaq və ona fiziki nəzarəti ələ keçirsək, İranın nefti və iqtisadiyyatı üzərində boğucu nəzarət qurmuş olacağıq. Bu, zənginləşdirilmiş uran ehtiyatlarını ələ keçirmək və nüvə obyektlərini sökmək üçün lazım olan ən böyük vasitə olardı”, - Kin əlavə edib.

Müəllif: Tural