"Mossad"ın yeni rəhbəri kimdir?

İsrailin Baş naziri Benyamin Netanyahunun hərbi katibi, general-mayor Roman Hofman "Mossad" kəşfiyyat xidmətinin direktoru vəzifəsinə təyin edilib.

Publika.az xəbər verir ki, bu barədə İsrail hökumət başçısının dəftərxanasının yaydığı məlumata görə, Hofmanın namizədliyi yüksək vəzifələrə təyinatlar üzrə məsləhət komitəsi tərəfindən təsdiqlənib.

Hofmanın vəzifəyə nə zaman başlayacağı da məlumdur. O, hazırkı direktor David Barneanın səlahiyyət müddəti bitdikdən sonra, 2 iyun 2026-cı ildə rəsmi olaraq vəzifəyə başlayacaq.

R.Hofman kimdir?

O, 1976-cı ildə Belarusun Mozır şəhərində anadan olub. 1990-cı ildə ailəsi ilə birlikdə İsrailə köçüb. 1995-ci ildə tank qoşunlarında xidmətə başlayıb. Daha sonra zabit kurslarını bitirib və müxtəlif hərbi bölmələrə, o cümlədən diviziyaya rəhbərlik edib.

7 oktyabr 2023-cü ildə, vəzifədə olmamasına baxmayaraq, könüllü olaraq Sderot şəhərinə gedərək HƏMAS ilə toqquşmalarda iştirak edib. Bu zaman ağır yaralanıb. Onun bir neçə fələstinli döyüşçünü zərərsizləşdirdiyi məlum olub.

2022-ci ildə Quru Qoşunlarının Milli Təlim Mərkəzinin rəhbəri, 2024-cü ilin mayında isə Netanyahunun hərbi katibi vəzifəsində çalışıb.