"Apple" fırıldaqçılığa görə bu tətbiqi sildi

“Apple” 5 milyondan çox yüklənmiş fırıldaqçı “Freecash” tətbiqini silib.

Publika.az xəbər verir ki, bu barədə “MacRumors” məlumat yayıb.

Bildirilib ki, “Apple”, istifadəçi məlumatlarının toplanması ilə bağlı platforma siyasətinin pozuntuları aşkar edildikdən sonra “Freecash” tətbiqini “App Store”-dan silib.

“Freecash” yanvar ayında “TikTok” vasitəsilə aktiv şəkildə tanıdılması sayəsində ABŞ “App Store” seqmentində populyarlığa görə ikinci yeri tutub. Reklamlarda istifadəçilərə video izləməklə saatda 35 dollara qədər gəlir vəd edilsə də, faktiki pul qazanma modeli fərqli olub.

Qeyd olunub ki, tətbiq istifadəçi cəlbetmə mexanizmlərindən istifadə edib və geniş həcmdə istifadəçi məlumatları toplayıb. Bu məlumatlara biometrik göstəricilərdən tutmuş sağlamlıq, dini inanc və digər şəxsi xüsusiyyətlər kimi həssas informasiyalar da daxil olub. Digər məlumatlar isə tətbiq daxilində quraşdırılması təklif olunan üçüncü tərəf mobil oyunlar vasitəsilə toplanıb.

“Apple” bildirib ki, xidmət platforma qaydalarını pozur və bu qaydalar fırıldaqçılıq təcrübələrini və yanlış marketinq iddialarını qadağan edir.

Müəllif: Roza