"Kosmosdakı göz" Pentaqonu qorxutdu - Müharibənin görünməyən üzü

Çinin peyk texnologiyasındakı irəliləyişləri Yaxın Şərqdəki Amerika qüvvələri üçün potensial təhlükə yaradır.

Publika.az xəbər verir ki, bu barədə “The Wall Street Journal” nəşri məlumat yayıb.

Bildirilir ki, ABŞ və İsrail İrana müharibə elan etdikdən bəri, Çin şirkətləri tərəfindən münaqişə zonasından əldə edilən peyk görüntüləri yayılır. Bu da sözügedən peyklərin Tehrana və digər ABŞ düşmənlərinə döyüş meydanında rəhbərlik etmək potensialına malik olduğuna dair şərhlərə səbəb olub.

Çinin süni intellekt şirkəti “MizarVision” bu yaxınlarda peyk məlumatlarını təhlil edən süni intellektdən istifadə edərək Amerika təyyarədaşıyanlarının, F-22 gizli təyyarələrinin və B-52 bombardmançılarının hərəkətlərini izlədiyini iddia edib. Bu iddia ABŞ-ın Yaxın Şərqdə bu cür məlumatların istifadəsi ilə bağlı narahatlıqlarını artırıb.

Dekabr ayında dərc edilmiş Pentaqonun Çinin hərbi gücü ilə bağlı qiymətləndirmə hesabatında Çində yerləşən kommersiya peyk şirkətlərinin İran İnqilab Keşikçiləri Korpusu (SEPAH) ilə kommersiya əlaqələrinin olduğu bildirilib. Pentaqon məsələ ilə bağlı ətraflı məlumat verməyib və İranın hərbi əməliyyatlarda Çin görüntülərindən istifadə edib-etmədiyi müəyyən edilməyib.

Qeyri-kommersiya peyk xidməti olan “Common Space”-in həmtəsisçisi Bill Qririn sözlərinə görə, ABŞ-ın İranla bağlı kommersiya görüntülərinə qeyri-müəyyən məhdudiyyətləri var, lakin Çin şirkətləri eyni məhdudiyyətlərə məruz qalmır: “Beləliklə, iranlılar ehtiyac duyduqları məlumatları əldə etməyə davam edirlər, lakin ictimaiyyət kənarda qalır”.

Çin dövlət mediasına görə, Çinin orbitdə 640-dan çox məsafədən zondlama kommersiya peyki var. Qeyd olunur ki, bu səbəbdən ABŞ üçün aşkarlanmadan avadanlıqları gizlətmək, hərəkət etdirmək və ya yerləşdirmək daha çətin olacaq.

Müəllif: Roza