Trampın Türkiyə səfərinin təfərrüatı: Ankarada kimlərlə görüşəcək?

Xəbər verdiyimiz kimi, ABŞ prezidenti Donald Tramp NATO Liderlər Zirvəsi çərçivəsində Ankaraya səfər edəcək.

Publika.az xəbər verir ki, Ağ Evin məlumatına görə, Tramp zirvə proqramından sonra Ukrayna prezidenti Volodimir Zelenski və Suriya prezidenti Əhməd Əl Şaraa ilə ikitərəfli görüşlər keçirəcək.

Bildirilib ki, Trampı Ankarada Türkiyə prezidenti Rəcəb Tayyib Ərdoğan qarşılayacaq. ABŞ prezidenti NATO liderlərinin şam yeməyinə, zirvə iclasına və ənənəvi ailə fotosuna qatılacaq.

Ağ Evin açıqlamasına əsasən, Trampın Zelenski ilə görüşündə əsas müzakirə mövzusu Ukraynada müharibənin dayandırılması və diplomatik həll yolları olacaq. Açıqlamada Vaşinqtonun həm Rusiya, həm də Ukrayna ilə təmaslarını davam etdirdiyi və Trampın vasitəçilik səylərini sürdürdüyü də vurğulanıb.

Bundan başqa, zirvədə İranla bağlı regional təhlükəsizlik riskləri, dəniz ticarət marşrutlarının qorunması, NATO-nun müdafiə xərcləri və Alyans daxilində yük bölgüsü məsələlərinin də müzakirə ediləcəyi gözlənilir.

Həmçinin zirvə çərçivəsində ABŞ müdafiə sənayesi ilə bağlı yeni əməkdaşlıq sazişlərinin və milyardlarla dollar dəyərində müdafiə layihələrinin açıqlana biləcəyi qeyd olunub.

Müəllif: Roza