Gecə Polşanı silkələyən partlayışın görüntüləri ortaya çıxdı: Rusiya raketi iddiası - VİDEO

Xəbər verdiyimiz kimi, Polşada iyulun 30-na keçən gecə Lyublin voyevodluğunda güclü partlayış baş verib. Ölkənin hava məkanını pozaraq düşən naməlum obyektin müşahidə kameraları tərəfindən qeydə alınmış görüntüləri yayılıb.

Publika.az xəbər verir ki, bu barədə Polşanın "Bilgoraj.com.pl" portalı məlumat yayıb.

Görüntülər Turobin qminasında yerləşən evlərdən birinin müşahidə kamerası tərəfindən qeydə alınıb. Kamera obyektin düşdüyü və böyük çuxurun yarandığı Tarnava-Koloniya yaşayış məntəqəsindən təxminən 8 kilometr aralıda yerləşir.

Kadrlarda güclü partlayış səsi eşidilir. Kameradakı vaxta əsasən, obyekt səhər saat 03:45-də yerə düşüb.

Polşa mediası hökumətdə obyektin Rusiyaya məxsus raket olması ehtimalının üstün tutulduğunu yazır.

Ukraynanın xarici işlər naziri Andriy Sibiqa isə bunun Rusiyaya məxsus "X-101" qanadlı raketi olduğunu bildirib.

Hadisədən sonra Polşanın Baş naziri Donald Tusk proqramını dəyişərək təcili şəkildə Lyublin voyevodluğuna yollanıb. Hadisə ilə bağlı araşdırma davam edir.

Müəllif: Adəm