İtaliya Makronun təşəbbüsünə "yox" dedi - Roma hərbçi göndərməyəcək

İtaliya Fransa prezidenti Emmanuel Makronun təşəbbüsü ilə 2026-cı ilin payızında keçirilməsi planlaşdırılan “könüllülər koalisiyası”nın birgə hərbi təlimlərində iştirak etməyəcək.

Publika.az xəbər verir ki, bu barədə "La Repubblica" nəşri İtaliya hökumətindəki mənbələrə istinadən məlumat yayıb.

Bildirilib ki, Romanın qərarı baş nazir Corcia Meloni hökumətinin əvvəlki mövqeyinə uyğundur. İtaliya hakimiyyəti öz hərbçilərinin Ukraynaya göndərilməsinə qarşı çıxmaqda davam edir.

Məlumata görə, Makron “könüllülər koalisiyası”na daxil olan ölkələrin liderlərinin videokonfransı zamanı 2026-cı ilin oktyabr-noyabr aylarında birgə təlimlər keçirilməsi planını açıqlayıb. Müzakirələrdə Ukrayna nümayəndələri də iştirak edib.

Nəşrin mənbələrinin sözlərinə görə, İtaliya bu təşəbbüsə qoşulmaq niyyətində deyil. Romanın mümkün hərbi kontingentin Ukraynada yerləşdirilməsi ilə bağlı mövqeyi dəyişməyib.

Qeyd edək ki, “könüllülər koalisiyası”nın iştirakçıları münaqişə başa çatdıqdan sonra Ukraynaya çoxmillətli qüvvələrin göndərilməsi niyyətlərini daha əvvəl təsdiqləyiblər. Lakin mümkün kontingentin sayı hələ açıqlanmayıb.

Müəllif: Adəm