Minlərlə FBI agentinin məlumatları oğurlandı - Hakerlərdən şok iddia

ABŞ Federal Təhqiqatlar Bürosu (FBI) minlərlə əməkdaşının şəxsi məlumatlarının oğurlandığına dair iddialardan sonra mümkün kibertəhlükəsizlik pozuntusunu araşdırır.

Publika.az xəbər verir ki, bu barədə “CNN International” məlumat yayıb.

Bildirilib ki, “Shiny Hunters” adlı haker qrupu FBI-ın məlumatlarına giriş əldə etdiyini iddia edib. Qrupun açıqlamasından bir neçə saat sonra FBI hadisədən xəbərdar olduğunu və araşdırmanın başladıldığını təsdiqləyib.

Hadisə fonunda FBI-ın işə qəbul portalı “FBIjobs.gov” da müvəqqəti olaraq fəaliyyətini dayandırıb. Hakerlərin məqsədi isə hələlik məlum deyil. Qrup FBI-dan daha əvvəl yayımladığı kibertəhlükəsizlik xəbərdarlığını silməyi və ya dəyişdirməyi tələb edib. Bununla belə, qrup hücumun maliyyə məqsədi daşımadığını bildirib.

FBI daha əvvəl “Shiny Hunters” qrupunun texnologiya, maliyyə, pərakəndə satış və səhiyyə sektorlarında iri qurumları hədəfə aldığını açıqlamışdı. Qrupun milyonlarla müştəri məlumatını oğurladığı bildirilir.

Qeyd edək ki, FBI son illərdə bir neçə kibertəhlükə ilə üzləşib. 2023-cü ildə qurumun Nyu-Yorkdakı ofisinin bəzi kompüter sistemlərinə müdaxilə edilmiş, həmin sistemlərdən birinin Cefri Epşteyn işi ilə bağlı görüntülərin saxlanılmasında istifadə olunduğu bildirilmişdi.

Müəllif: Roza