İran ABŞ-a plan təqdim etdiyini təsdiqlədi - Cavab gözləyirlər

İranlı diplomatlar Qətər vasitəçiləri ilə əlaqə saxlayır və tezliklə ABŞ-ın təkliflərə cavabını almağa ümid edirlər.

Publika.az “Əl-Cəzirə”yə istinadla xəbər verir ki, bunu İranın xarici işlər naziri Abbas Əraqçi deyib.

Nəşrin məlumatına görə, Əraqçi jurnalistlərə bildirib ki, Tehran Nyu-Yorkda Qətər vasitəçiləri vasitəsilə ABŞ ilə dolayı danışıqlar aparıb və Vaşinqtonun çərşənbə axşamı rəsmi cavab verəcəyinə ümid edir.

Əraqçi izah edib ki, BMT Baş Assambleyasının iclası üçün Nyu-Yorka səfəri zamanı İran tərəfi böhranın həlli və Hörmüz boğazında əməliyyatların bərpası planını təqdim edib.

Nazir bildirib ki, "Bizim missiyamız bu şərtləri Amerika tərəfinə və digər ölkələrə çatdırmaq, beynəlxalq ictimaiyyətin İranın bu məsələdə bir planı olduğunu bilməsini təmin etmək idi".

O əlavə edib ki, son görüş zamanı Qətər vasitəçiləri fikir ayrılıqlarının aradan qaldırılmasına kömək etmək üçün yeni ideyalar irəli sürüblər və bu ideyalar Vaşinqtona ötürülür.

Daha əvvəl ABŞ prezidenti Donald Tramp jurnalistlərə açıqlamasında Amerika tərəfinin bazar ertəsi günü vasitəçilər vasitəsilə iranlılarla danışıqlar apardığını təsdiqləmişdi.

Müəllif: Tural