Almaniyadan Avropaya Türkiyə ilə bağlı çağırış: Ehtiyacımız var

Almaniyanın Şimali Reyn-Vestfaliya əyalətinin baş naziri Hendrik Vüst Avropa İttifaqı (Aİ) ilə Türkiyə arasında gömrük məsələsində islahat aparılmasının və viza prosedurlarının təkmilləşdirilməsinin vacibliyini vurğulayıb.

Publika.az xəbər verir ki, Vüst Türkiyəyə səfəri çərçivəsində sosial şəbəkə hesabında paylaşım edərək, rəhbərlik etdiyi əyalətlə Türkiyə arasında güclü iqtisadi və sosial əlaqələrin olduğunu bildirib.

“Heç bir regionun Türkiyə ilə Şimali Reyn-Vestfaliya qədər sıx sosial və iqtisadi əlaqələri yoxdur. Bu sıx əlaqə bizim qayğı ilə qoruduğumuz bir gücdür”, - deyə o qeyd edib.

Vüst əlaqələrin daha da gücləndirilməsi üçün Aİ-Türkiyə Gömrük İttifaqında islahatların aparılmasına və viza prosedurlarının yaxşılaşdırılmasına ehtiyac olduğunu bildirib. O, bu istiqamətdə səylərini davam etdirəcəyini vurğulayıb.

Qeyd edək ki, Vüst Türkiyəyə səfərinin ilk günündə Ankarada prezident Rəcəb Tayyib Ərdoğan tərəfindən qəbul edilib. Görüşdə əsasən Şimali Reyn-Vestfaliya ilə Türkiyə arasındakı iqtisadi əməkdaşlıq və Gömrük İttifaqının müasirləşdirilməsi məsələləri müzakirə olunub.

Müəllif: Roza