Bayıldakı sürüşmə ilə bağlı Nazirlər Kabinetindən VACİB TAPŞIRIQ: 1 ay ərzində...

“Bayıl yamacında baş verən sürüşmə sahəsində geoloji işlər sürətləndirilib. Geoloji araşdırmanın bir ay ərzində yekunlaşması ilə bağlı Nazirlər Kabinetindən tapşırıq verilib”.

Bunu Publika.az-a Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov deyib.

Ə.Qaralovun sözlərinə görə, təsdiq edilmiş plan əsasında aparılan geoloji işlər qısa zamanda yekunlaşacaq:

“Bu ayın sonuna kimi çöl işlərini yekunlaşdırıb, gələn ayın birinci yarısında yekun hesabatı Nazirlər Kabinetinə təqdim edəcəyik. Bundan sonra aidiyyəti qurumlar iş aparıb, ərazidən müvəqqəti olaraq köçürülən ailələrin orada yaşayıb-yaşamayacağı barədə qərar verəcək”.

Ə.Qaralov Bayılın Buxta küçəsində mayın 15-də baş verən sürüşmə ərazisində quraşdırılan mayaklarda mütəmadi monitorinqlər apardıqlarını deyib:

“Bu saata olan məlumata görə, sürüşmə sahəsində aktivlik müşahidə edilmir. Həmin küçədə sovet dövründə tikilmiş binaya bitişik yarımtıkilidə baş vermiş çatda da dəyişiklik qeyd alınmır. Tikilidə 15 sm çat yaranıb, lakin o bina üçün təhlükə yaratmır”.

Ekspedisiya rəisi Şamaxıdakı sürüşmədən də danışıb. O vurğulayıb ki, yerli sakinlər və Şamaxı Rayon İcra Hakimiyyəti başçısının müraciəti əsasında rayonun sürüşmə sahələrində monitorinqlər aparılıb:

“Rayondan ümumilikdə “Qaynar xətt” xidmətinə 37 müraciət daxil olub, onların 17-si İcra Başçısının adından edilib. Həmin müraciətlər əsasında əməkdaşlarımız ərazidə olub. Rayonun Muğanlı, Dədəgünəş, Çaylı və digər yaşayış məntəqələrində müşahidələr aparılıb. Lakin sürşümə sahələrində aktivlik qeydə alınmayıb”.

Gülxar