Telman İsmayılov iki aylıq HƏBS EDİLDİ - YENİLƏNDİ

Monteneqroda saxlanılan Çerkizovski bazarının keçmiş direktoru Telman İsmayılov barəsində 2 ay müddətinə həbs qətimkan tədbiri seçilib.

Publika.az "İnterfax"a istinadla xəbər verir ki, bunu T. İsmayılovun vəkili Marina Rusakova deyib.

Onun sözlərinə görə, qərardan artıq apellyasiya şikayəti verilib:

“Telman İsmayılov siyasi sığınacaq üçün müraciəti yoxlanılan zamanı saxlanılıb. Bu da şikayət üçün əsaslardan biridir. Həbs olunmasına baxmayaraq, Monteneqro İsmayılovun apellyasiya şikayəti ilə bağlı hələ bir qərar verməyib, ona siyasi sığınacaq verilməsi məsələsi ölkə hakimiyyəti tərəfindən baxılmaqdadır”

Vəkil bildirib ki, Monteneqro hökuməti T. İsmayılova siyasi sığınacaq verməkdən imtina edərsə, onun Rusiyaya təhvil verilməsi məsələsi iki aya qədər çəkə bilər.

Qeyd edək ki, Rusiyanın ən varlı iş adamları siyahısında olan Telman İsmayılov iki sahibkarın qətlini təşkil etməkdə ittiham olunur. İsmayılova 11 noyabr 2017-ci ildə ittiham irəli sürülüb, azərbaycanlı iş adamının axtarışı İnterpol vasitəsilə həyata keçirilib.

xxx

11:09

Rusiyanın paytaxtı Moskvada fəaliyyət göstərən Çerkizovski bazarının keçmiş direktoru Telman İsmayılovun Monteneqroda saxlanılmasının səbəbi məlum olub.

Lenta.ru HTB telekanalına istinadən xəbər verir ki, azərbaycanlı iş adamı bir neçə qətlin təşkilatında ittiham olunur. Qeyd olunur ki, söhbət iki iş adamı - Vladimir Savkin və Yuri Brılyovun 11 noyabr 2016-cı il tarixində öldürülməsindən gedir. Rusiyada Telman İsmayılovu ömürlük həbs gözləyir.

Bundan əlavə qeyd olunur ki, iş adamlarının öldürülməsindən başqa, T.İsmayılov müğənni Avraam Russonun 2004-cü ildə qaçırılmasında da ittiham olunur.

xxx

Məşhur biznesmen, Moskvada Çerkizovski bazarının keçmiş sahibi Telman İsmayılov saxlanılıb.

Publika.az xəbər verir ki, azərbaycanlı iş adamı bu gün Monteneqroda hüquq-mühafizə orqanlarının əməkdaşları tərəfindən saxlanılıb.

Qeyd olunur ki, ilkin məlumata görə, o, 2 sahibkarın qətlini təşkil etməkdə ittiham olunur. İsmayılova 11 noyabr 2017-ci ildə ittiham irəli sürülüb, azərbaycanlı iş adamının axtarışı İnterpol vasitəsilə həyata keçirilib. Bu ilin iyun ayında Monteneqro polisi Podqoritsa bölgəsində beynəlxalq həbs qərarı çıxarılan iki xarici vətəndaşı axtardıqlarını bildirib. Onlardan biri iş adamı Telman İsmayılov olub.

T.İsmayılov 2018-ci ildə Monteneqro vətəndaşlığı alıb.

Monteneqronun dövlət qurumları T.İsmayılovun saxlanılması barədə hələlik məlumat yaymayıb.