Hadisə

Sürüşmə zonasında yeraltı suların səviyyəsi aşağı düşüb - Samir Vəliyev

22 Oktyabr 2021 11:26

"Badamdar sürüşmə sahəsində 2018-ci ildə başlamış sürüşməyə qarşı əks tədbirlər layihəsi çərçivəsində Fövqəladə Hallar Nazirliyinin nəzdində Yaponiya şirkətinin əməkdaşları ilə birlikdə dörd mərhələli layihə hazırlanıb. Layihəyə əsasən, ilk olaraq sürüşmənin əsas səbəbkarlarından olan yeraltı suların ərazidən kənarlaşdırılması üçün tədbirlər görülüb".

Publika.az xəbər verir ki, bunu jurnalistlərə açıqlamasında Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyinin “Azərinşaatlayihə” institutunun geoloji axtarış şöbəsinin rəisi Samir Vəliyev deyib.

O bildirib ki, həmin tədbirlərdə dərinliyi 30 metr olan 3,5 metr diametrli dərin vertikal istiqamətində quyular qazılıb: "Həmin quyuların içərisindən isə uzunluğu 50-60 metr olan üfiqi istiqamətdə sugötürücülər quraşdırılıb. Hazırda bu işlər yekunlaşdırılıb. Aparılan müşahidələrə görə, yeraltı suların səviyyəsi 7-8 metr aşağı düşüb. Bu mərhələ yekunlaşdıqdan sonra isə digər mərhələlərdə Badamdar-20-ci sahə avtomobil yolunun sağ tərəfində dərinliyi 9 metr olan dəmir-beton konstruksiyalar üzərində istinad divarı inşa edilib. Bu işlər yekunlaşdırılıb, yolun bir hissəsi torpaq kütləsindən təmizlənib. İkinci mərhələ üzrə isə terraslarda dəmir-beton konstruksiyalar üzərində rosveklər quraşdırılmaqla bərkitmə işlərinə başlanılıb, birinci terras üzrə işlər yekunlaşıb. Hazırda ikinci terras üzrə dəmir-beton svayların vurulması işləri həyata keçirilir".

S.Vəliyev qeyd edib ki, bu mərhələlər başa çatdıqdan sonra yamacın yuxarı hissəsində ankerləmə işləri davam edəcək: "Bu da yamacbərkitmə işlərinə aiddir. Yəni burada 5-6 metr olmaqla ankerlər vurulacaq. Vurulduqdan sonra isə üzəri betonla hamarlanacaq. Bu mərhələlər qurtardıqdan sonra sürüşmə sahəsində infiltrasiya olunmuş digər ehtimal olunan suları kənarlaşdırmaq üçün qalereyalar quraşdırılacaq ki, bu da drenaj şəbəkəsidir və əlavə suları sahədən kənarlaşdırmaq üçün nəzərdə tutulur. Bu işlər yekunlaşdıqdan sonra isə yamacda abadlıq işləri həyata keçiriləcək və yamac tam formaya düşəcək, torpaq hamarlama işləri aparılacaq".

Akqabay

Foto: Ceyhun Rəhimov