Qəzada yaralanan Sərxan palataya köçürüldü

Ötən ay yol-nəqliyyat hadisəsində başından xəsarət alan 10 yaşlı Sərxan müalicə aldığı xəstəxananın Reanimasiya şöbəsindən palataya köçürülüb.

Publika.az xəbər verir ki, bu barədə “Qafqazinfo”nun sorğusuna cavab olaraq Mərkəzi Klinik Xəstəxanadan məlumat verilib.

Bildirilib ki, xəstədə fizioterapiya və reabilitasiya məşqlərinə başlanılıb: “Xəstəmiz 7 gündür ayıq vəziyyətdə müşahidə olunur. Şüuru açıqdır, verilən göstərişlərə əməl edir və ətraf mühitlə əlaqəsi mövcuddur. Fizioterapiya və reabilitasiya prosesi başlanıb. Xəstənin reanimasiya (intensiv terapiya) ehtiyacı qalmayıb, bu səbəbdən reanimasiya şöbəsindən çıxarılaraq palataya köçürülüb”.

Xəstəxanadan həmçinin bildirilib ki, palatada fizioterapiya və reabilitasiya məşqləri davam etdirilir: “Xəstə fasilələrlə yeridilməyə başlanıb. Reabilitasiya müddətinin uzunluğu xəstənin klinik vəziyyətindən və müalicəyə verdiyi cavabdan asılıdır. Proses yaxından izlənilir və uzunmüddətli perspektivdə xəstəmizin tam qüsursuz, sağlam şəkildə həyatına davam edəcəyi ümid edilir”.

Xatırladaq ki, hadisə Bakının mərkəzi küçələrindən birində baş verib. Qəza zamanı piyada səkisində olan 10 yaşlı Sərxanın başına yol nişanı çırpılıb.