Hadisə

Bakı-Sumqayıt yolunda çökmə aktivləşib - TƏHLÜKƏ

12 Oktyabr 2015 17:30

Bakı-Sumqayıt yolunun Avtovağzal ərazisində baş verən çökmədə dəyişiklik müşahidə edilir.

Bunu Publika.az-a açıqlamasında Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji Planlama Ekspedisiyasının baş geoloqu Ələmdar Piriyev deyib.

Onun sözlərinə görə, bu gün əraziyə baxış zamanı çökmə prosesinin davam etdiyi məlum olub:

“Çökmənin dinamikasında əvvəlki günlərə nisbətən artım var. Çatlar genişlənib və müəyyən qədər də oturub. Oturmanın dinamikasında da fəallaşma gedir. Ərazidə monitorinqlərimiz davam edir”.

Baş geoloq çökmənin qarşısını almaq üçün bərkitmə işlərinin aparıldığını bildirib.

“Ərazidə suvarma işlərinin dayandırıldığını müşahidə etdik. Həmçinin müvafiq qurumlar tərəfindən bərkitmə işləri də aparılır. Bu işlərin nə qədər effektli olacağını zamanla görəcəyik”.

Qeyd edək ki, oktyabrın 7-də Bakı-Sumqayıt yolunda sürüşmə qeydə alınıb ki, nəticədə yolun müəyyən hissəsində çökmə baş verib.

Gülxar