Bakıda itkin düşən məktəbli qız tapıldı (YENİLƏNİB)

Bakıda orta məktəbdə itkin düşdüyü deyilən məktəbli qız, 2004-cü il təvəllüdlü Gülcan Hafiz qızı İsmayılova tapılıb.

Bu barədə şagirdin təhsil aldığı Binəqədi rayonu 283 saylı orta məktəbin direktor müavini Sevinc Musayeva məlumat verib.

Direktor müavini bildirib ki, adıçəkilən şagird itkin düşməyib və bu uşağın anasının polisə verdiyi məlumat yalandır: "Uşaq itkin düşməyib. Sadəcə şagirdin atası ilə anası ayrılıb və uşaq ananın yanında qalırmış. Ana isə ataya övladını görməyə icazə vermirmiş. Mayın 31-də şagird orta məktəbdən çıxıb evə gedərkən məktəbin yaxınlığında atası ilə rastlaşıb. Uşaq öz razılığı ilə atasının evinə gedib və bir gün orada qalıb. Bundan xəbər tutan ana hirsindən polisə müraciət edərək uşağının itkin düşdüyünü deyib. İyunun 1-də, yəni bu gün səhər atası uşağı yenidən məktəbə gətirib və şagird anasına təhvil verilib. Hələ bu azmış kimi, ana bu barədə məlumatın yayılmasında məktəbi günahlandırıb". (Trend)

***

Bakıda orta məktəb şagirdi itkin düşüb.

Binəqədi rayon Polis İdarəsindən APA-ya verilən məlumata görə, hadisə mayın 31-də qeyd alınıb. 283 saylı orta məktəbin şagirdi, 2004-cü il təvəllüdlü Gülcan Hafiz qızı İsmayılova məktəbdən çıxdıqdan sonra itkin düşüb.

Onun tapılması istiqamətində axtarışlar davam etdirilir.