Fransa futbolu bu qalmaqalla silkələndi: Futbolçular döyüldü

Fransa futbolunda görünməmiş qalmaqal yaşanıb.

Publika.az xəbər verir ki, "Nitsa" futbolçuları ardıcıl altıncı məğlubiyyətdən sonra öz azarkeşlərinin kütləvi hücumuna məruz qalıb.

Komanda növbəti uğursuzluqdan sonra gəldiyi məşq bazasının yaxınlığında hücuma məruz qalıb. Təxminən 400 hiddətli çılğın fanat komandanın avtobusunun yanında onları gözləyib. Əvvəlcə azarkeşlər baş məşqçi Frank Esin istefasını tələb ediblər, lakin qarşıdurma çox tez nəzarətdən çıxıb.

Azarkeş qrupunun lideri avtobusa daxil olaraq futbolçuların kütlənin qarşısına çıxmasını tələb edib. Orada isə artıq hücumlar başlayıb. Ən çox zərər görənlər hücumçular Terem Moffi və Jeremi Boqa olub. Futbolçulara tüpürüldükdən sonra onlar amansızcasına təpik zərbələri ilə döyülüb.

Hadisədən sonra azarkeşlərin bir qismi Moffi və Boqanın artıq klub üçün oynamamalı olduqlarını bildirib. "Nitsa" rəhbərliyi hələlik rəsmi qərar verməkdən çəkinir, lakin baş verənlər son illərdə Fransa futbolunun ən utancverici olaylarından biri kimi qiymətləndirilir.

Daha sonra məlum olub ki, Boqa və Moffi azarkeşlərlə qarşıdurma zamanı aldıqları ağır xəsarətlərə görə komandanın yaxın vaxtlardakı oyunlarında iştirak edə bilməyəcəklər. Bundan əlavə, futbolçular artıq polisə müraciət ediblər və hadisə ilə bağlı araşdırma başlayıb.

Xatırladaq ki, hazırda "Nitsa" mövsümdə böhran yaşayır. Komanda ardıcıl altı oyunda uduzub, Liqa 1-də 10-cu pilləyə enib və Avropa Liqasında sonuncu yerdə qərarlaşıb.

Heybət