“Barselona” müdafiəçi ala bilməsə, Flik bu addımı atacaq

“Barselona”nın baş məşqçisi Hansi Flik Andreas Kristensenin ön çarpaz bağlarının qopmasından sonra klub rəhbərliyinə yeni mərkəz müdafiəçisi transfer etməyin vacibliyini bildirib.

Publika.az xəbər verir ki, lakin maliyyə məhdudiyyətləri və bazardakı variantların azlığı səbəbindən yanvar ayında transferin baş tutmaması ehtimalı yüksəkdir. Hazırda “Barsa”nın mərkəz müdafiəsində seçimləri xeyli məhduddur. Komandanın sərəncamında yalnız Jerard Martin (məcburi variant kimi), Erik Qarsiya və Pau Kubarsi qalır. Ronald Arauxo isə psixoloji problemlərdən sonra bərpa mərhələsindədir və hələlik tam etibarlı hesab edilmir.

“Diario Sport”un məlumatına görə, Hansi Flik çıxış yolunu “La Masiya” akademiyasında axtarmaq qərarına gəlib və bu istiqamətdə xüsusi plan hazırlayıb.

Almaniyalı mütəxəssis klub daxilində yüksək qiymətləndirilən, solayaqlı 18 yaşlı mərkəz müdafiəçisi Andres Kuensanı əsas komandaya cəlb edib. Bildirilir ki, ona şans veriləcəyi halda Kuensa Pau Kubarsi kimi növbəti böyük kəşfə çevrilə bilər.

Bununla belə, Flik yalnız Kuensa ilə kifayətlənmir və digər alternativ variantları da nəzərdən keçirməyə davam edir.