Bu klublar daha çox qazanacaq: Turnirin mükafat fondu rekord həddə artırıldı

2026-cı ildə Səudiyyə Ərəbistanında keçiriləcək İspaniya Superkuboku tarixində ən yüksək mükafat fonduna malik olacaq.

Publika.az xəbər verir ki, turnirdə iştirak edəcək 4 klub arasında ümumilikdə 23 milyon avro bölüşdürüləcək ki, bu da ötən illə müqayisədə 3 milyon avro çoxdur.

“Barselona”, “Real”, “Atletiko” və “Atletik” bu məbləği paylaşacaq və hər bir klub əvvəlki illərlə müqayisədə daha yüksək gəlir əldə edəcək. 2026-cı il buraxılışı üçün İspaniya Futbol Federasiyası (RFEF) ödənişləri artıraraq ümumi bölgünü 23 milyon avroya çatdıracaq. Ümumilikdə turnirin RFEF-ə 51,9 milyon avro gəlir gətirəcəyi gözlənilir. Bu məbləğin 27 milyon avrosu sponsorluqdan, 11,5 milyon avrosu təşkilati və iştirak haqlarından, 12,69 milyon avrosu isə televiziya hüquqlarından əldə olunacaq. Ümumi gəlirin təxminən 28 milyon avrosu qeyri-peşəkar futbolun inkişafına yönəldiləcək.

2025-ci ildə Superkubokun ümumi mükafat fondu təxminən 20 milyon avro təşkil etmişdi. Turnirin qalibi olan “Barselona” sabit ödəniş kimi 6 milyon avro, finala yüksəlməyə görə 1 milyon avro və kuboku qazanmağa görə 2 milyon avro olmaqla ümumilikdə 9 milyon avroya yaxın gəlir əldə etmişdi. Finalçı “Real” 7,15 milyon avro, “Atletik” 2 milyon avro, “Malyorka” isə 850 min avro qazanmışdı.

Qeyd edək ki, İspaniya Superkuboku yanvarın 7-də “Barselona” – “Atletik” oyunu ilə start götürəcək. Yanvarın 8-də isə “Real” “Atletiko” ilə qarşılaşacaq. Bu turnir ümumilikdə altıncı dəfə, hazırkı dördkomandalı formatda isə ardıcıl beşinci dəfə Səudiyyə Ərəbistanında keçiriləcək.

Heybət