İdman

16 yaşlı idmançı İsveçrədəki dəhşətli yanğında öldü

2 Yanvar 2026 19:14

İsveçrədəki xizək kurortunda baş verən yanğın nəticəsində 16 yaşlı italyan qolfçu Emanuele Qaleppini ölüb.

Publika.az xəbər verir ki, bu barədə “La Gazzetta dello Sport” məlumat yayıb.

Yeni il gecəsi İsveçrənin Krans Montana xizək kurortundakı “Le Constellation” barında böyük yanğın baş verib. Yanğın yerli vaxtla təxminən saat 1:30-da baş verib.

Yanğın 40-dan çox insanın həyatına son qoyub. Daha 115 nəfər yaralanıb, onlardan ən azı 80-nin vəziyyəti ağırdır. İsveçrə beş günlük matəm elan edib. Ölənlər arasında İtaliya qolfunun ən parlaq ümidlərindən biri hesab edilən Qaleppini də var.

Yanğında 19 yaşlı fransız futbolçu Tahiris Dos Santos da xəsarət alıb. O, “Mets”in ehtiyat komandasında sol cinah müdafiəçisi kimi oynayır, eyni zamanda bir neçə dəfə əsas komandanın heyətində yer alıb. O, ağır yanıq xəsarətləri alıb və Almaniyadakı xəstəxanaya yerləşdirilib.