Mourinyo “Real”la oyunlardan danışdı: Onlar əsl krallardır

“Benfika”nın baş məşqçisi Joze Mourinyo Çempionlar Liqasının pley-off mərhələsinin püşkatmasının nəticələrini şərh edib.

Publika.az xəbər verir ki, 1/8 finala vəsiqə uğrunda Portuqaliya təmsilçisi Madridin “Real” klubu ilə qarşılaşacaq. Komandalar ÇL-in ümumi mərhələsinin 8-ci turunda da üz-üzə gəlmişdi. Həmin oyunda “Benfika” 4:2 hesablı qələbə qazanmışdı.

“Bizim cəmi iki variantımız var idi: “Real” və ya “İnter”. Seçim böyük deyildi. Bizə krallar düşdü. Bir neçə gün əvvəl “Real”ın futbolçusu oyundan sonra mənə formasını təklif edəndə, zarafatla həmkarlarıma onların qolda daşıdığı emblemi göstərdim. 15 titul… Onlar əsl krallardır. Bununla hər şey aydındır. Bu, sadəcə tarix deyil. Biz bu turnirin şübhəsiz ki, əsas favoritinə qarşı oynayacağıq. Amma bundan əvvəl bizi üç oyun gözləyir: “Tondela”, “Santa-Klara” və “Alverka” ilə. Bizim diqqətimizi məhz bu matçlara yönəltməyimiz lazımdır”, – deyə Mourinyo “Marca”ya açıqlamasında bildirib.

“Benfika” və “Real” arasında ilk oyun fevralın 17-də Lissabonda keçiriləcək.