"Liverpul" ÇL-dən kənarda qalsa, neçə milyon itirəcək?

"Vulverhempton"a 1:2 hesablı məğlubiyyət fonunda "Liverpul"un İngiltərə Premyer Liqasında "ilk beşliy"i tərk etməsi komandanın Avropanın ən nüfuzlu klub turnirinə vəsiqə qazanmaq ümidlərinə ciddi zərbə vurub.

Publika.az xəbər verir ki, bu vəziyyət klub üçün ciddi maliyyə itkiləri ilə nəticələnə bilər. Çempionlar Liqasında iştirakla Avropa Liqasında çıxış arasındakı fərq təxminən 120 milyon funtdur. Bu barədə BBC məlumat yayıb.

Ötən mövsüm "Liverpul" Çempionlar Liqasının 1/8 finalına yüksəldiyi üçün UEFA mükafatlarından 85,3 milyon funt qazanıb. 2023/24 mövsümündə isə "qırmızılar" Avropa Liqasının 1/4 finalında mübarizəni dayandıraraq 23,3 milyon funt əldə edib.

Mükafat pullarından əlavə, oyun günlərində əldə olunan gəlirlər və kommersiya gəlirləri də təsirlənə bilər. Çünki əsas sponsor müqavilələrinin bəzilərində Çempionlar Liqasında iştirakla bağlı bonus maddələri yer alır.

Buna baxmayaraq, "Liverpul"un maliyyə vəziyyətinin kifayət qədər güclü olduğu və Çempionlar Liqasından bir mövsüm kənarda qalmağın klub üçün fəlakətli nəticə yaratmayacağı qeyd olunur.

Heybət