İdman

Məhkəmə təcavüzdə ittham olunan futbolçu ilə bağlı qərar verdi

11 Mart 2026 22:34

Nigeriyanın U-20 millisinin futbolçusu Daniel Daqa Norveçdə məhkəmə hökmü ilə 6 ay azadlıqdan məhrum edilib.

Aut.az xəbər verir ki, Nordmore və Romsdal dairə məhkəməsinin qərarına əsasən, 19 yaşlı yarımmüdafiəçi qarşı tərəfin razılığı olmadan cinsi əlaqədə olmaqda təqsirli bilinib. Bundan əlavə, futbolçu 10 min Norveç kronu məbləğində əlavə məhkəmə xərclərini də ödəməlidir.

Bununla belə, qərar hələ qüvvəyə minməyib. Daqa vəkili vasitəsilə apellyasiya şikayəti verdiyi üçün iş Norveçin məhkəmə sistemində araşdırılmağa davam edəcək.

Qeyd edək ki, futbolçunun çıxış etdiyi “Molde” klubu ittihamlar iki ay əvvəl ortaya çıxdıqdan sonra onu məşqlərdən və bütün klub fəaliyyətlərindən uzaqlaşdırmışdı. Klub bildirib ki, hüquqi proses başa çatana qədər oyunçu komandaya qayıtmayacaq.

Daniel Daqa daha əvvəl “Enyimba” klubunda çıxış edib və Nigeriyanın U-20 millisi ilə gənclər arasında dünya çempionatında iştirak edib.