Ukrayna Dünya Kubokundan kənarda qaldı

Ukrayna millisi 2026-cı il futbol üzrə dünya çempionatında iştirak hüququ uğrunda keçirilən Avropa pley-off turnirinin yarımfinal matçında İsveç komandasına 1:3 hesabı ilə məğlub olub.

Publika.az xəbər verir ki, görüş İspaniyanın Valensiya şəhərində baş tutub.

Qaliblərin heyətində Viktor Dyökereş het-trik edib (6, 51, 73-cü dəqiqələr). O, sonuncu qolu penaltidən vurub. Məğlub olan tərəfdən isə Matvey Ponomarenko (90+1) qol müəllifi olub. Pley-off turnirinin finalında isveçlilər öz yarımfinalında Albaniya komandasına qalib gələn (2:1) Polşa millisi ilə qarşılaşacaqlar. Həlledici oyun martın 31-də keçiriləcək.

Ukrayna millisi dünya çempionatının final mərhələsində bir dəfə iştirak edib - 2006-cı ildə Almaniyada keçirilən turnirdə dörddəbir finala qədər yüksəlib. İsveçin aktivində dünya çempionatlarının bir gümüş və iki bürünc medalı var; onların final mərhələsində sonuncu iştirakı "Tre Krunur"un dörddəbir finala çatdığı DÇ-2018 (Rusiya) olub.

Futbol üzrə dünya çempionatı 11 iyun - 19 iyul tarixlərində ABŞ, Kanada və Meksikada keçiriləcək. Bundan əvvəl Yaxın Şərqdə münaqişənin kəskinləşməsi və ABŞ-ın bu prosesdə iştirakı fonunda İran millisinin dünya çempionatında oynamaqdan imtina edə biləcəyi bildirilirdi. Sonradan məlum olub ki, İranda komandanın oyunlarının ABŞ-dan Meksikaya keçirilməsi mümkünlüyü FİFA ilə müzakirə edilir.

Hüseyn İbadlı