“Barselona” onun transferindən imtina etdi: Pul yoxdur

“Barselona”nın “Tottenhem”in futbolçusu Xavi Simonsi transfer edəcəyi ilə bağlı şayiələr son günlər artsa da, klub bu variantdan imtina edib.

Publika.az xəbər verir ki, London klubunun uğursuz mövsüm keçirməsi, Premyer Liqada aşağı sıralara düşməsi və “Atletiko”ya uduzaraq Çempionlar Liqasından kənarlaşması fonunda 22 yaşlı niderlandlı hücumameyilli yarımmüdafiəçinin gedişi ilə bağlı iddialar güclənmişdi.

Buna baxmayaraq, “Barsa” rəhbərliyi transferi məqsədəuyğun hesab etmir. Bildirilir ki, bu keçid üçün təxminən 45 milyon avro tələb olunur və bu məbləğ klubun maliyyə vəziyyəti üçün çox yüksək sayılır.

İdman baxımından da bu addım müsbət qiymətləndirilməyib. Klub hesab edir ki, vaxtilə PSJ-yə gedən Simonsun geri qaytarılması akademiya sisteminə yanlış siqnal verə bilər.

Hazırda “Barselona” daha çox öz yetirmələrinə güvənməyi planlaşdırır və hücum xətti üçün digər variantları, o cümlədən Markus Reşfordun komandada qalmaq ehtimalını dəyərləndirir. Beləliklə, Xavi Simons hazırda “Barselona”nın transfer planlarında yer almır.