Luçeskunun aylar əvvəl dediyi sözlər gündəm oldu: Xəstələnəcəm və öləcəm

Aprelin 7-də vəfat edən Mırça Luçesku məşqçi kimi Avropa futbolunda dərin iz buraxıb.

Publika.az xəbər verir ki, rumıniyalı mütəxəssisin aylar əvvəl verdiyi bir açıqlama ölümündən sonra gündəm olub. Onun 12 oktyabr 2025-ci ildə Avstriya üzərində qələbədən sonra (1:0) dediyi sözlər xatırlanıb:

“Mənim 80 yaşım var. Heç kimə paxıllıq etmirəm, başqa maraqlarım yoxdur. Yeganə marağım uğurdur. Mən bununla yaşayıram. Əgər uğur qazanmasam, xəstələnəcəm və öləcəm!”

Maraqlısı budur ki, titullu məşqçi çərşənbə axşamı 80 yaşında vəfat edib. Onun son oyunu 26 mart tarixində baş tutub. Luçeskunun rəhbərlik etdiyi Rumıniya millisi Türkiyəyə 0:1 hesabı ilə məğlub olaraq dünya çempionatına vəsiqə uğrunda pley-offun finalına yüksələ bilməyib.

Bundan sonra onun ürəyində ciddi problemlər yaşanıb. Xəstəxanaya yerləşdirilən Luçeski bir neçə dəfə infarkt keçirib. Ürəyi tibbi müdaxilələrə cavab verməyib. Əvvəlcə komaya düşüb, sonra isə fiziki ölüm reallaşıb.

Bu həftə keçirilən avrokubok oyunları Mırça Luçeskunun xatirəsinə bir dəqiqəlik sükutla başlayıb.

Heybət