Millinin futbolçusu oyun vaxtı özünü 12 saniyəyə biabır etdi - Video

İsveçrə ilə İordaniya arasında keçirilən yoldaşlıq oyunu sosial şəbəkələrdə geniş müzakirə olunan maraqlı epizodla yadda qalıb.

Publika.az xəbər verir ki, Avropa komandası 1:0 hesabı ilə öndə olduğu vaxt rəqib komandasının liderlərindən biri olan Musa Əl-Tamari təşəbbüsü öz üzərinə götürərək komanda yoldaşlarını yüksək pressinqə keçməyə çağırıb. Bununla o, faktiki olaraq məşqçilər korpusunun hazırladığı oyun planından kənara çıxmağı təklif edib. Lakin hadisələrin sonrakı inkişafı onun planının uğursuz olduğunu göstərib.

Top oyuna daxil edildikdən dərhal sonra isveçrəlilər cəmi bir neçə ötürmə ilə pressinqdən çıxaraq demək olar ki, bütün meydanı keçiblər və təkbətək vəziyyət yaradıblar. Hücumu Dan Ndoye dəqiq zərbə ilə başa vurub. Bütün bu hadisələr cəmi 12 saniyə ərzində baş verib.

Epizod qısa müddətdə viral xarakter alıb. Azarkeşlər zarafatla qeyd ediblər ki, Əl-Tamari məşqçilərin niyə matçın gedişində spontan taktiki eksperimentləri hər zaman dəstəkləmədiyini öz təcrübəsində görüb.

Bununla belə, İordaniya millisinin futbolçusu məhsuldar ötürmə müəllifi olub və 61-ci dəqiqədə əvəzlənib.

Matçın yekununda isə İsveçrə millisi rəqibini 4:1 hesabı ilə məğlub edib.